భారత కేంద్ర హోంశాఖ విదేశీ ప్రయాణాలు, వీసాలు మరియు ఇమ్మిగ్రేషన్ ప్రక్రియల్లో కీలక మార్పులు చేస్తూ ‘ఇమ్మిగ్రేషన్ అండ్ ఫారినర్స్ (ఎగ్జంప్షన్) (అమెండ్‌మెంట్) ఆర్డర్-2026’ పేరుతో సవరణల గెజిట్ నోటిఫికేషన్‌ను విడుదల చేసింది. నవంబర్ 4న ఆమోదం పొందిన ఈ నూతన నిబంధనలు నవంబర్ 5, 2026 నుండి తక్షణమే దేశవ్యాప్తంగా అమల్లోకి వచ్చినట్లు కేంద్ర హోంశాఖ జాయింట్ సెక్రటరీ డాక్టర్ సందీప్ ఎన్. మహాత్మే ఉత్తర్వుల్లో పేర్కొన్నారు.
ఈ కొత్త ఇమ్మిగ్రేషన్ నిబంధనలలోని ప్రధాన ముఖ్యాంశాలు:
నేపాల్, భూటాన్ ప్రయాణ మార్గదర్శకాలు: భారత్ నుండి నేపాల్, భూటాన్ దేశాలకు వెళ్లే లేదా ఆ దేశాల నుండి వచ్చే పౌరులు తమ గుర్తింపు ధృవీకరణ కోసం ‘వీసా మాన్యువల్’ లో పేర్కొన్న అధికారిక పత్రాలలో ఏదైనా ఒకదానిని ఇమ్మిగ్రేషన్ అధికారులకు తప్పనిసరిగా చూపించాలి. అయితే చైనా, మకావు, హాంగ్‌కాంగ్ లేదా పాకిస్థాన్ ల్యాండ్ బోర్డర్ మార్గాల ద్వారా వచ్చే వారికి మాత్రం చెల్లుబాటు అయ్యే పాస్‌పోర్ట్ మరియు వీసా నిబంధనలు వర్తిస్తాయి.
శరణార్థులు మరియు సైనికులకు మినహాయింపులు: 2015 జనవరి 9కి ముందు భారత్‌లో నమోదైన శ్రీలంక తమిళ శరణార్థులకు, అలాగే 2024 డిసెంబర్ 31 లేదా అంతకంటే ముందు మతపరమైన వేధింపుల కారణంగా బంగ్లాదేశ్, పాకిస్థాన్, అఫ్ఘనిస్తాన్ నుండి వచ్చిన మైనారిటీలకు (హిందూ, సిక్కు, బౌద్ధ, జైన, పార్శీ, క్రైస్తవ) పాస్‌పోర్ట్ లేకున్నా ప్రత్యేక ఇమ్మిగ్రేషన్ మినహాయింపులు కల్పించారు. సైనిక సిబ్బంది అధికారిక ప్రయాణాలకు కూడా నిబంధనల్లో సడలింపులు ఇచ్చారు.
భారతీయ సంతతి వ్యక్తులకు సడలింపులు: గతంలో భారతీయ పాస్‌పోర్ట్ కలిగి ఉండి, ప్రస్తుతం మలేషియా లేదా సింగపూర్ పౌరసత్వం పొందిన భారతీయ సంతతి వ్యక్తులకు నిర్దేశిత షరతులతో ప్రత్యేక మినహాయింపులు పొందే వెసులుబాటును హోంశాఖ కల్పించింది.
ప్రయాణికులు మరియు విదేశీయుల కదలికలను మరింత కచ్చితత్వంతో పర్యవేక్షించడం, డేటా భద్రతను పెంచడం మరియు సరిహద్దు చెక్‌పోస్టుల వద్ద పారదర్శకతను పెంచడమే లక్ష్యంగా కేంద్ర ప్రభుత్వం ఈ సవరణలను తీసుకువచ్చింది.
సరిహద్దు ప్రాంతాల్లో రాకపోకలు సాగించే ప్రయాణికులు, విదేశీ పౌరులు చెల్లుబాటు అయ్యే ఐడెంటిటీ కార్డులు మరియు పాస్‌పోర్ట్ పత్రాలతో నిర్దేశిత అధీకృత చెక్‌పోస్టుల ద్వారానే ప్రయాణించాలని అధికారులు స్పష్టం చేశారు.
