రక్షణ పరిశోధన మరియు అభివృద్ధి సంస్థ (DRDO) ఒడిశా తీరంలోని డాక్టర్ ఏపీజే అబ్దుల్ కలామ్ ద్వీపం వద్ద స్వదేశీ పరిజ్ఞానంతో రూపొందించిన ‘ప్రళయ్’ (Pralay) క్వాసి-బాలిస్టిక్ క్షిపణి వినియోగదారు మదింపు పరీక్షలను (User Evaluation Trials) విజవంతంగా పూర్తి చేసింది. ఉపరితలం నుండి ఉపరితల లక్ష్యాలను ఛేదించే ఈ స్వల్ప శ్రేణి క్షిపణి ప్రయోగంలో నిర్దేశించుకున్న అన్ని లక్ష్యాలను పూర్తిస్థాయిలో సాధించిందని డిఆర్‌డిఓ వర్గాలు వెల్లడించాయి.
క్షిపణి సాంకేతిక వివరాలు మరియు విశేషాలు
లక్ష్య ఛేదన సామర్థ్యం: ‘ప్రళయ్’ క్షిపణి 150 నుండి 500 కిలోమీటర్ల దూరంలోని లక్ష్యాలను అత్యంత ఖచ్చితత్వంతో ధ్వంసం చేయగలదు.
మధ్యంతర దిశ మార్పు (Mid-Flight Maneuvers): ఈ క్షిపణి క్వాసి-బాలిస్టిక్ మార్గంలో పయనిస్తూ, శత్రువుల క్షిపణి నిరోధక వ్యవస్థలను తప్పుదోవ పట్టించడానికి గాలిలోనే తన దిశను వేగంగా మార్చుకునే ప్రత్యేక సాంకేతికతను కలిగి ఉంది.
స్వదేశీ పరిజ్ఞానం: హైదరాబాద్‌లోని రీసెర్చ్ సెంటర్ ఇమారత్ (RCI) మరియు ఇతర డిఆర్‌డిఓ పరిశోధనాలయాలు సంయుక్తంగా ఈ వ్యవస్థను అభివృద్ధి చేయగా, భారత్ డైనమిక్స్ లిమిటెడ్ (BDL) దీనిని ఉత్పత్తి చేస్తోంది.
సైన్యంలో చేరికకు తుది అడుగులు
ఈ విజయవంతమైన ప్రయోగంపై భారత రక్షణ మంత్రి రాజ్‌నాథ్ సింగ్ హర్షం వ్యక్తం చేశారు. దేశీయ రక్షణ సాంకేతికతల సామర్థ్యానికి ఇది ఒక కీలక మైలురాయిగా నిలుస్తుందని, ఈ క్షిపణి త్వరలోనే భారతీయ సైన్యం మరియు వైమానిక దళంలో చేరడానికి మార్గం సుగమమైందని ఆయన తెలిపారు. భారత ఇంటెగ్రేటెడ్ రాకెట్ ఫోర్స్ (IRF) నిర్మాణంలో ‘ప్రళయ్’ క్షిపణులు అత్యంత కీలక పాత్ర పోషించనున్నాయి.
