సిడ్నీ: సముద్ర గర్భంలో నిశ్శబ్దంగా ప్రయాణిస్తూ శత్రు నౌకలపై దాడి చేయగల సరికొత్త స్వయంప్రతిపత్తి నీటి అడుగున డ్రోన్ల సామర్థ్యాలను ఆస్ట్రేలియా వెల్లడించింది. ‘ఘోస్ట్‌ షార్క్‌’ (Ghost Shark) పేరుతో అభివృద్ధి చేసిన ఈ భారీ అన్‌మ్యాన్డ్‌ అండర్‌వాటర్‌ వెహికల్స్‌ ఇప్పుడు సముద్రపు మందుపాతరలను అమర్చడం, గగనతల డ్రోన్లను ప్రయోగించడం, ప్రత్యేక దళాలకు అవసరమైన సామగ్రిని చేరవేయడం వంటి పనులు చేయగలవు. అక్టోబర్‌ 19న ఆస్ట్రేలియా రక్షణ శాఖ వెల్లడించిన ఈ వివరాలు ఆధునిక సముద్ర యుద్ధంలో స్వయంచాలక సాంకేతికత ప్రాధాన్యం ఎంత వేగంగా పెరుగుతోందో తెలియజేస్తున్నాయి.
నీటి అడుగునుంచి గగనతలానికి డ్రోన్ల దాడి
ఘోస్ట్‌ షార్క్‌ వ్యవస్థలో అత్యంత కీలకమైన సామర్థ్యం గగనతల డ్రోన్లను నీటి అడుగునుంచే ప్రయోగించడం. ఇందులో అమర్చే ‘ఆల్టియస్‌’ (ALTIUS) డ్రోన్లను శత్రు నౌకల కదలికలను గుర్తించడం, నిఘా నిర్వహించడం వంటి పనులకు ఉపయోగించవచ్చు. అవసరమైతే పేలుడు పదార్థాలతో కూడిన దాడి డ్రోన్లుగా కూడా అవి పనిచేయగలవు. రక్షణ శాఖ వివరాల ప్రకారం, ఈ డ్రోన్లు శత్రు లక్ష్యాలపై దాడి చేసే సామర్థ్యాన్ని కలిగి ఉన్నాయి. దీంతో మనుషులు ప్రయాణించే యుద్ధనౌకలు నేరుగా ప్రమాదకర ప్రాంతాల్లోకి వెళ్లాల్సిన అవసరాన్ని తగ్గించవచ్చని అధికారులు భావిస్తున్నారు.
ఒకేసారి 12 సముద్ర మందుపాతరలు
ఘోస్ట్‌ షార్క్‌ మరో కీలక సామర్థ్యం సముద్రంలో మందుపాతరలను అమర్చడం. ఈ డ్రోన్‌ ఒకేసారి 12 వరకు సముద్ర మందుపాతరలను మోసుకెళ్లగలదని ఆస్ట్రేలియా వెల్లడించింది. కీలక జలమార్గాల్లో నౌకల రాకపోకలను నిరోధించడానికి లేదా ప్రత్యర్థి నౌకాదళ కదలికలను పరిమితం చేయడానికి వీటిని ఉపయోగించవచ్చు. అంతేకాకుండా, ప్రత్యేక దళాలకు అవసరమైన పరికరాలు, ఇతర సామగ్రిని నీటి అడుగున రహస్య ప్రదేశాల్లో ఉంచి, అవసరమైనప్పుడు తిరిగి పొందేలా సరఫరా వ్యవస్థను కూడా ఇందులో ఏర్పాటు చేశారు. నిఘా, దాడి, సరఫరా వంటి వేర్వేరు పనుల కోసం దీనిలోని పరికరాలను మార్చుకునే వీలుంది.
రూ. వేల కోట్ల ఒప్పందం.. ఆస్ట్రేలియాలోనే తయారీ
అమెరికాకు చెందిన రక్షణ సాంకేతిక సంస్థ ఆండ్రిల్‌ (Anduril), ఆస్ట్రేలియా శాస్త్రవేత్తలు, రక్షణ రంగ నిపుణుల సహకారంతో ఈ వ్యవస్థను అభివృద్ధి చేశారు. 2025లో కుదిరిన ఐదేళ్ల ఒప్పందం విలువ 1.7 బిలియన్‌ ఆస్ట్రేలియన్‌ డాలర్లు. ఈ ఒప్పందం కింద డజన్ల కొద్దీ ఘోస్ట్‌ షార్క్‌ వాహనాలను తయారు చేసి రాయల్‌ ఆస్ట్రేలియన్‌ నేవీకి అందించనున్నారు. న్యూ సౌత్‌ వేల్స్‌లోని తయారీ కేంద్రంలో ఉత్పత్తి కొనసాగుతోంది. ఇప్పటికే తొలి యూనిట్‌ను నేవీకి అందించగా, మరిన్ని వాహనాలను రాబోయే సంవత్సరాల్లో దశలవారీగా అందించాలని ప్రణాళిక రూపొందించారు. సాంప్రదాయ జలాంతర్గాములతో పోలిస్తే, మానవ సిబ్బందికి ప్రమాదం తగ్గిస్తూ దీర్ఘకాలిక నిఘా, రహస్య కార్యకలాపాలను నిర్వహించడం ఈ వ్యవస్థ ప్రధాన ఉద్దేశం.
AUKUS భాగస్వామ్యంలో కీలక అడుగు
అమెరికా, బ్రిటన్‌తో కలిసి ఆస్ట్రేలియా చేపడుతున్న AUKUS రక్షణ భాగస్వామ్యంలోనూ ఘోస్ట్‌ షార్క్‌ ప్రాధాన్యం పెరుగుతోంది. ముఖ్యంగా స్వయంచాలక సముద్ర వ్యవస్థలకు అవసరమైన సెన్సర్లు, ఆయుధాలు, ఇతర పరికరాల అభివృద్ధిలో భాగస్వామ్య దేశాలు సహకరించనున్నాయి. అమెరికా, బ్రిటన్‌ ఈ డ్రోన్‌ సామర్థ్యాలను పరిశీలించే అవకాశం ఉందని ఆస్ట్రేలియా అధికారులు తెలిపారు. భవిష్యత్తులో మిత్రదేశాలకు ఎగుమతి చేసే అవకాశాలపైనా చర్చలు జరుగుతున్నాయి. అయితే, ఎగుమతులు ప్రభుత్వ అనుమతులకు లోబడి ఉంటాయి. మానవ సిబ్బందితో నడిచే నౌకలు, జలాంతర్గాములకు ప్రత్యామ్నాయంగా కాకుండా, వాటి సామర్థ్యాలను పెంచే వ్యవస్థగా ఘోస్ట్‌ షార్క్‌ను ఆస్ట్రేలియా చూస్తోంది. ఈ సాంకేతికత సముద్ర భద్రత, నిఘా, యుద్ధ వ్యూహాల్లో ఎలాంటి మార్పులు తీసుకువస్తుందో రాబోయే సంవత్సరాల్లో స్పష్టమవుతుంది.
