ముంబై: ప్రముఖ ఔషధ సంస్థ సిప్లాకు చెందిన పుణెలోని గోదాముపై మహారాష్ట్ర ఔషధ నియంత్రణ శాఖ కఠిన చర్యలు తీసుకుంది. పుణెలోని వడ్కి ప్రాంతంలో ఉన్న సిప్లా ఔషధ నిల్వ, పంపిణీ కేంద్రానికి సంబంధించిన ఔషధాల విక్రయ, పంపిణీ అనుమతులను రద్దు చేసింది. Reactin Plus ఔషధానికి సంబంధించిన ప్యాకేజింగ్‌లో అనుమతించని ప్రచార అంశాలు ఉండటం, మందుల నిల్వలో నిబంధనల ఉల్లంఘనలు, రికార్డుల నిర్వహణలో లోపాలు ఉన్నాయని అధికారులు పేర్కొన్నారు.
Reactin Plus చుట్టూ వివాదం
ఈ వ్యవహారంలో ప్రధానంగా Reactin Plus అనే వైద్యుల సూచనతో మాత్రమే వినియోగించాల్సిన ఔషధం ప్యాకేజింగ్‌పై అధికారులు అభ్యంతరం వ్యక్తం చేశారు. ఈ మందు నొప్పి నివారణకు ఉపయోగపడుతుందని, తలనొప్పి, కండరాల నొప్పి, వెన్నునొప్పి, కీళ్ల నొప్పి, బెణుకు, శరీర నొప్పి, పంటి నొప్పి వంటి సమస్యలకు ఉపశమనం కలిగిస్తుందని ప్యాకేజింగ్‌పై పేర్కొన్నట్లు అధికారులు తెలిపారు.
అయితే మందు ప్యాకేజింగ్‌పై ఇటువంటి ప్రచార వాదనలు, చిత్రాలు ఉండటం సంబంధిత ఔషధ నిబంధనలకు అనుగుణంగా లేదని మహారాష్ట్ర ఔషధ నియంత్రణ శాఖ పేర్కొంది. ఈ కారణంగా మందు ప్యాకేజింగ్ విషయంలో నిబంధనల ఉల్లంఘన జరిగిందని అధికారులు అభిప్రాయపడ్డారు.
మందుల నిల్వలోనూ లోపాలు
గోదాములో మందులను నిల్వ చేసిన విధానంపైనా అధికారులు పలు అభ్యంతరాలు వ్యక్తం చేశారు. కొన్ని మందుల పెట్టెలను సరైన అరలు లేదా పీటలపై కాకుండా నేలపై ఉంచినట్లు, కొన్ని ఔషధాల పెట్టెలపై దుమ్ము పేరుకుపోయినట్లు తనిఖీల్లో గుర్తించినట్లు తెలిపారు. గడువు ముగిసిన మందులను ఇతర మందుల నుంచి వేరు చేసి, వాటిని విక్రయించరాదనే స్పష్టమైన గుర్తింపుతో ప్రత్యేక ప్రాంతంలో ఉంచాల్సి ఉంటుంది. అయితే ఇందుకు అవసరమైన ప్రత్యేక ఏర్పాట్లు, మందుల తొలగింపు విధానం, సంబంధిత రికార్డుల నిర్వహణలో కూడా లోపాలు ఉన్నట్లు అధికారులు పేర్కొన్నారు.
నిల్వ వివరాల్లో తేడాలు
గోదాములో ఉన్న మందుల అసలు నిల్వకు, సంస్థ కంప్యూటర్‌లో నమోదైన వివరాలకు మధ్య కొన్ని తేడాలు ఉన్నట్లు కూడా ఔషధ నియంత్రణ శాఖ తన నివేదికలో పేర్కొంది. మందుల కొనుగోలు, విక్రయ పత్రాలు, నిల్వ వివరాలు, సంబంధిత సంతకాలు వంటి అంశాల్లోనూ అసమానతలు గుర్తించినట్లు తెలిపింది. మందుల వ్యాపారంలో కేవలం కంప్యూటర్‌లో వివరాలను నమోదు చేయడం మాత్రమే కాకుండా, వాస్తవంగా గోదాములో ఉన్న మందుల నిల్వ, వాటి భద్రత, నిల్వ పరిస్థితులు, గడువు తేదీలు, కొనుగోలు–విక్రయ వివరాలు కూడా నిబంధనలకు అనుగుణంగా ఉండాలని అధికారులు స్పష్టం చేశారు.
గతంలోనూ చర్యలు
ఈ వ్యవహారంపై ఆగస్టు 27న మహారాష్ట్ర ఔషధ నియంత్రణ శాఖ తొలిసారి లైసెన్సు రద్దు చర్య తీసుకుంది. అయితే సిప్లా ఈ నిర్ణయాన్ని బాంబే హైకోర్టులో సవాలు చేసింది. కంపెనీకి తగిన అవకాశం ఇవ్వకుండా చర్య తీసుకున్నారనే అంశంపై న్యాయస్థానం అభ్యంతరాలు వ్యక్తం చేయడంతో అధికారులు తమ మొదటి ఉత్తర్వును వెనక్కి తీసుకున్నారు.
ఆ తర్వాత సెప్టెంబర్ 4న సిప్లాకు కొత్తగా వివరణ కోరుతూ నోటీసు ఇచ్చారు. కంపెనీ సెప్టెంబర్ 11న తన సమాధానాన్ని సమర్పించింది. అనంతరం సెప్టెంబర్ 21న కంపెనీ ప్రతినిధులకు తమ వాదన వినిపించే అవకాశం ఇచ్చిన తర్వాత, తనిఖీ నివేదికలు, కంపెనీ సమాధానం, అందుబాటులో ఉన్న ఇతర వివరాలను పరిశీలించి అక్టోబర్ 1న తాజా ఉత్తర్వులు జారీ చేసినట్లు అధికారులు తెలిపారు.
సిప్లా స్పందన ఏమిటంటే?
మహారాష్ట్ర ఔషధ నియంత్రణ శాఖ తీసుకున్న తాజా నిర్ణయంపై సిప్లా అసంతృప్తి వ్యక్తం చేసింది. ఈ ఉత్తర్వును పరిశీలిస్తున్నామని, తదుపరి చర్యలపై నిర్ణయం తీసుకుంటామని తెలిపింది. తమ పుణె కేంద్రంలో ఔషధాల నిల్వ, పంపిణీకి సంబంధించిన నిర్దేశిత విధానాలను పాటిస్తున్నామని కంపెనీ పేర్కొంది. ఔషధాల నాణ్యత, రోగుల భద్రతకు తాము అత్యంత ప్రాధాన్యం ఇస్తామని సిప్లా వెల్లడించింది.
