పాకిస్థాన్‌పై భారత్ ఘన విజయం.. ఆసియా క్రీడల్లో మరోసారి క్రికెట్ స్వర్ణం!

నాగోయా: ఎలాంటి ఒత్తిడి ఉన్నా.. ప్రత్యర్థి పాకిస్థాన్ అయినా.. తుది పోరులో భారత జట్టు మరోసారి తన సత్తా చాటింది. జపాన్‌లో జరుగుతున్న 2026 ఆసియా క్రీడల్లో పురుషుల క్రికెట్ స్వర్ణ పతకాన్ని భారత్ సొంతం చేసుకుంది. చిరకాల ప్రత్యర్థి పాకిస్థాన్‌ను 19 పరుగుల తేడాతో ఓడించి వరుసగా రెండోసారి ఆసియా క్రీడల క్రికెట్‌లో బంగారు పతకాన్ని ముద్దాడింది.

211 పరుగుల భారీ స్కోరు

టాస్ గెలిచిన భారత కెప్టెన్ శ్రేయస్ అయ్యర్ తొలుత బ్యాటింగ్ ఎంచుకున్నాడు. మ్యాచ్ కి ముందు జపాన్ క్రికెట్ గ్రౌండ్స్ లో పరుగులు రాబట్టడం చాలా కష్టం అని మరియు యావరేజ్ స్కోర్ అంచనా 170గా మాత్రమే ఉండటం ఈ మ్యాచ్ ను మరింత ఆసక్తికరంగా మార్చాయి.

కానీ ముందు వచ్చిన శర్మ తర్వాత వచ్చిన వర్మ మ్యాచ్ స్వరూపాన్ని పూర్తిగా మార్చేశారు. ఓపెనర్ అభిషేక్ శర్మ పాకిస్థాన్ బౌలర్లపై విరుచుకుపడి కేవలం 28 బంతుల్లోనే 61 పరుగులు చేశాడు. ఇందులో 3 ఫోర్లు, ఏకంగా 7 సిక్సర్లు ఉన్నాయి. పవర్‌ప్లేలో అతడి దూకుడు భారత్‌కు భారీ స్కోరుకు బలమైన పునాది వేసింది. అభిషేక్ తర్వాత తిలక్ వర్మ ఇన్నింగ్స్‌ను మరో స్థాయికి తీసుకెళ్లాడు. కేవలం 22 బంతుల్లోనే 51 పరుగులతో నాటౌట్‌గా నిలిచాడు. చివర్లో శివమ్ దూబే కూడా కీలక పరుగులు జోడించడంతో 20 ఓవర్లలో భారత్ 211/6కు చేరుకుంది. ఇది ఈ ఆసియా క్రీడల పురుషుల క్రికెట్ టోర్నీలో ఇప్పటివరకు నమోదైన అత్యధిక స్కోరు.

212 పరుగుల లక్ష్యంతో బరిలోకి దిగిన పాకిస్థాన్‌కు భారత బౌలర్లు ప్రారంభం నుంచే ఇబ్బందులు సృష్టించారు. ఒక దశలో పాకిస్థాన్ 76 పరుగులకే మూడు వికెట్లు కోల్పోయింది. అయితే హసన్ నవాజ్ అద్భుత పోరాటం చేశాడు. భారత బౌలర్లను ధీటుగా ఎదుర్కొంటూ కేవలం 51 బంతుల్లో 96 పరుగులు చేశాడు. నవాజ్ చివరి వరకు పోరాడినా మిగతా బ్యాటర్ల నుంచి తగిన సహకారం లభించలేదు. నిర్ణీత 20 ఓవర్లలో పాకిస్థాన్ 192/6కు మాత్రమే పరిమితమైంది. దీంతో భారత్ 19 పరుగుల తేడాతో విజయం సాధించి స్వర్ణ పతకాన్ని అందుకుంది.

రెండోసారి బంగారు పతకం

ఆసియా క్రీడల పురుషుల క్రికెట్‌లో భారత్‌కు ఇది వరుసగా రెండో స్వర్ణం. గత ఆసియా క్రీడల్లోనూ భారత్ బంగారు పతకం సాధించింది. ఈసారి ఫైనల్లో పాకిస్థాన్‌ను ఓడించడం విజయానికి మరింత ప్రత్యేకతను తీసుకొచ్చింది. మహిళల జట్టు కూడా ఈ క్రీడల్లో ఇప్పటికే స్వర్ణం సాధించడంతో భారత్ క్రికెట్‌లో గోల్డెన్ డబుల్ పూర్తి చేసింది.  పాకిస్థాన్‌పై ఫైనల్ విజయం, వరుసగా రెండో క్రికెట్ స్వర్ణం, మహిళల జట్టు తర్వాత పురుషుల జట్టు కూడా బంగారం సాధించడం టీ20 క్రికెట్లో భారత ఆధిపత్యానికి నిదర్శనం.