సనా: యెమెన్‌లో మళ్లీ యుద్ధ మంటలు తీవ్రంగా ఎగసిపడుతున్నాయి. ఇరాన్ మద్దతు ఉన్న హౌతీ తిరుగుబాటుదారులు నైరుతి యెమెన్‌లోని కీలక పట్టణం తుర్బాను తమ ఆధీనంలోకి తీసుకున్నారు. వ్యూహాత్మకంగా అత్యంత కీలకమైన తైజ్ నగరాన్ని చుట్టుముట్టే దిశగా హౌతీలు ముందుకు సాగుతున్న సమయంలో ఈ పరిణామం చోటుచేసుకుంది. మరోవైపు హౌతీలను వెనక్కి నెట్టేందుకు సౌదీ అరేబియా మద్దతు ఉన్న యెమెన్ ప్రభుత్వ బలగాలు భారీ సైనిక చర్యకు దిగాయి.
తైజ్‌కు ఎందుకంత కీలకం?
తుర్బా పట్టణం యెమెన్‌లోని తైజ్–ఏదెన్ నగరాలను కలిపే ప్రధాన రహదారిపై ఉంది. తైజ్ యెమెన్‌లోని ముఖ్యమైన నగరాల్లో ఒకటి కాగా, ఏదెన్ ప్రస్తుతం అంతర్జాతీయంగా గుర్తింపు పొందిన యెమెన్ ప్రభుత్వానికి తాత్కాలిక కేంద్రంగా ఉంది. అందువల్ల తుర్బాపై నియంత్రణ సాధించడం ద్వారా తైజ్‌లోని ప్రభుత్వ బలగాలకు చేరే సరఫరాలు, అదనపు బలగాల రాకపోకలను హౌతీలు ప్రభావితం చేసే అవకాశం ఉంది. ఇప్పటికే తైజ్ నగర పరిసరాల్లోని పలు గ్రామాలు, ప్రాంతాలను హౌతీలు స్వాధీనం చేసుకున్నారు. దీంతో నగరాన్ని మరింతగా చుట్టుముట్టే ప్రమాదం ఉందన్న ఆందోళనలు వ్యక్తమవుతున్నాయి.
ఎర్ర సముద్ర తీరంలోనూ విస్తరణ
హౌతీల తాజా దూకుడు కేవలం తైజ్ ప్రాంతానికే పరిమితం కాలేదు. సెప్టెంబర్‌లో యెమెన్ పశ్చిమ తీరంలో వారు వేగంగా ముందుకు సాగి వ్యూహాత్మకమైన మోఖా పోర్టు నగరంతో పాటు సమీపంలోని కొన్ని ద్వీపాలను కూడా స్వాధీనం చేసుకున్నారు. ఈ ప్రాంతం బాబ్ అల్-మందెబ్ జలసంధికి సమీపంలో ఉండటం ప్రపంచ వాణిజ్యానికి కూడా కీలకం. ఎర్ర సముద్రాన్ని గల్ఫ్ ఆఫ్ ఏడెన్‌తో కలిపే ఈ ఇరుకైన సముద్ర మార్గం ద్వారా అంతర్జాతీయ వాణిజ్యంలో గణనీయమైన భాగం సాగుతుంది. అందుకే యెమెన్‌లో జరుగుతున్న పోరాటం కేవలం స్థానిక యుద్ధంగా కాకుండా అంతర్జాతీయ రవాణా, ఇంధన సరఫరాలపై ప్రభావం చూపే అంశంగా మారింది.
ప్రభుత్వ బలగాల ఎదురుదాడి
హౌతీల దూకుడుకు ప్రతిగా అంతర్జాతీయంగా గుర్తింపు పొందిన యెమెన్ ప్రభుత్వం “యెమెన్ డాన్” పేరుతో సైనిక చర్యను ప్రారంభించింది. హౌతీల ఆధీనంలోని ప్రాంతాలను తిరిగి స్వాధీనం చేసుకోవడం, ప్రభుత్వ నియంత్రణను పునరుద్ధరించడం ఈ ఆపరేషన్ లక్ష్యాలుగా ప్రభుత్వం చెబుతోంది. సౌదీ అరేబియా కూడా యెమెన్ ప్రభుత్వ బలగాలకు వైమానిక మద్దతు అందిస్తోంది. సోమవారం సౌదీ నేతృత్వంలోని కూటమి భారీ స్థాయిలో వైమానిక దాడులు నిర్వహించినట్లు సమాచారం. అదే సమయంలో ప్రభుత్వ అనుకూల బలగాలు బాబ్ అల్-మందెబ్ సమీపంలోని ధుబాబ్ ప్రాంతంలో హౌతీ స్థావరాలపై దాడులు ప్రారంభించాయి. యెమెన్ ప్రభుత్వ బలగాలు ధుబాబ్ జిల్లాలోని కీలక ప్రాంతాలను తిరిగి తమ ఆధీనంలోకి తీసుకున్నట్లు ప్రకటించాయి. అయితే హౌతీ వర్గాలు ఈ విజయాలను ఖండించాయి.
మళ్లీ తీవ్రమవుతున్న యెమెన్ సంక్షోభం
యెమెన్‌లో 2014లో హౌతీలు రాజధాని సనాను స్వాధీనం చేసుకున్నప్పటి నుంచి అంతర్యుద్ధం కొనసాగుతోంది. 2022లో ఏర్పడిన కాల్పుల విరమణ కారణంగా కొంతకాలం పరిస్థితి సద్దుమణిగినా, ఇటీవలి నెలల్లో ఘర్షణలు మళ్లీ తీవ్రమయ్యాయి. తాజా పోరాటాలు వేలాది కుటుంబాలను నిరాశ్రయులను చేస్తున్నాయి. ఇప్పటికే బలహీనంగా ఉన్న యెమెన్ ఆరోగ్య వ్యవస్థపై కూడా యుద్ధ ప్రభావం పడుతోంది. తైజ్ ప్రావిన్స్‌లో కొన్ని వైద్య కేంద్రాలు మూతపడగా, మరికొన్ని పరిమిత సామర్థ్యంతో పనిచేస్తున్నట్లు సమాచారం. యెమెన్‌లో హౌతీల ఆధిపత్యం పెరగడం, ప్రభుత్వ బలగాల ఎదురుదాడి, బాబ్ అల్-మందెబ్ వంటి కీలక సముద్ర మార్గాలపై ఏర్పడుతున్న ఒత్తిడి.. ఇవన్నీ కలిసి ఈ సంక్షోభాన్ని మరోసారి అంతర్జాతీయ ఆందోళనగా మార్చుతున్నాయి.
