ఆర్టిఫిషియల్ ఇంటెలిజెన్స్ (AI) చిప్‌ల రూపకల్పనలో ప్రపంచ దిగ్గజమైన ఎన్విడియా (Nvidia) సంస్థ తమ సీఈఓ జెన్సన్ హువాంగ్ (Jensen Huang) ప్రైవేట్ జీవితం మరియు చైనా నిఘా వర్గాలకు చెందిన అలిస్‌ అనే మహిళతో ఉన్నట్లు వస్తున్న ఆరోపణలపై చర్యలు వేగవంతం చేసింది. ఈ సున్నితమైన వ్యవహారంపై స్వతంత్ర మరియు నిష్పాక్షిక విచారణ జరిపేందుకు అమెరికాలోని అత్యంత ప్రముఖ న్యాయ సేవల సంస్థ ‘వాచెల్, లిప్టన్, రోసెన్ అండ్ కట్జ్’ (Wachtell, Lipton, Rosen & Katz) ను ఎన్విడియా నియమించుకుంది.
పెద్ద ఎత్తున కార్పొరేట్ లిటిగేషన్లు మరియు కార్పొరేట్ గవర్నెన్స్ విచారణలు జరపడంలో ఈ సంస్థ ప్రపంచవ్యాప్తంగా గుర్తింపు పొందింది. హువాంగ్‌పై వచ్చిన ఆరోపణలను స్వతంత్రంగా సమీక్షిస్తున్నామని ఎన్విడియా బోర్డు స్పష్టం చేసింది. అయితే, ఇప్పటివరకు కంపెనీ రహస్యాలు లేదా జాతీయ భద్రతకు సంబంధించిన డేటా ఏదీ లీక్ కాలేదని కంపెనీ ప్రాథమికంగా వెల్లడించింది. ఈ అంతర్గత విచారణకు జెన్సన్ హువాంగ్ పూర్తి సహకారాన్ని అందిస్తున్నట్లు తెలిపింది.
హువాంగ్‌కు అలిస్‌తో ఉన్న సంబంధాన్ని ముందే బహిర్గతం చేయకుండా బోర్డు వాటాదారులను తప్పుదోవ పట్టించిందని ఆరోపిస్తూ మదుపరులు కాలిఫోర్నియా కోర్టులో దావా వేశారు. బోర్డులోని పదిమంది సభ్యులకు జెన్సన్‌తో ఉన్న సుదీర్ఘ అనుబంధం వల్ల సరైన చర్యలు తీసుకోలేదని వారు వాదిస్తున్నారు.
ఈ ఆరోపణల కలకలం ఎన్విడియా మార్కెట్ విలువపై తీవ్ర ప్రభావం చూపింది. అమెరికా స్టాక్ మార్కెట్లో ఎన్విడియా షేర్లు 6 శాతానికి పైగా క్షీణించడంతో కొద్దిసేపు ప్రపంచంలోనే రెండవ అత్యంత విలువైన కంపెనీ హోదాను మైక్రోసాఫ్ట్‌కు కోల్పోవాల్సి వచ్చింది.
ఈ దర్యాప్తు ఫలితాలు ఎన్విడియా భవిష్యత్తు నాయకత్వంతో పాటు గ్లోబల్ టెక్ మార్కెట్లపై తీవ్ర ప్రభావం చూపే అవకాశం ఉందని ఆర్థిక విశ్లేషకులు భావిస్తున్నారు.
