భారతీయ పైలట్‌ స్మిత్ మచ్ఛర్‌కు అత్యున్నత పౌర పురస్కారంతో సత్కరించిన యూఏఈ

విమానంలో జరిగిన భయంకరమైన దాడిని ఎదుర్కొని, ప్రయాణికుల ప్రాణాలను కాపాడటంలో కీలక పాత్ర పోషించిన భారతీయ పైలట్‌ స్మిత్ మచ్ఛర్‌కు యునైటెడ్ అరబ్ ఎమిరేట్స్ (యూఏఈ) ప్రభుత్వం అరుదైన గౌరవాన్ని అందించింది. యూఏఈ అధ్యక్షుడు షేక్ మొహమ్మద్ బిన్ జాయెద్ అల్ నహ్యాన్, కెప్టెన్ స్మిత్ మచ్ఛర్‌తో పాటు ఫ్లైదుబాయ్ విమాన సిబ్బందికి ఫస్ట్ క్లాస్ ఆర్డర్ ఆఫ్ జాయెద్ II పురస్కారాన్ని ప్రదానం చేశారు. సెప్టెంబర్ 30న దుబాయ్‌ నుంచి ఇజ్రాయెల్‌లోని టెల్ అవీవ్‌కు వెళ్తున్న ఫ్లైదుబాయ్‌ విమానం FZ1073లో జరిగిన ప్రమాదకర ఘటన సమయంలో వారు చూపిన ధైర్యం, సమయస్ఫూర్తిని గుర్తిస్తూ ఈ పురస్కారం అందించారు. 

సెప్టెంబర్ 30న విమానం ప్రయాణిస్తుండగా సహ పైలట్‌ కెప్టెన్ మచ్ఛర్‌పై అత్యవసర పరిస్థితుల్లో ఉపయోగించే గొడ్డలి వంటి పరికరంతో దాడి చేసినట్లు నివేదికలు వెల్లడించాయి. ఈ దాడిలో మచ్ఛర్‌ తలకు తీవ్ర గాయాలయ్యాయి. దాడి అనంతరం విమానం కేవలం కొన్ని సెకన్ల వ్యవధిలో దాదాపు 14,000 అడుగుల మేర కిందికి పడిపోయింది. పరిస్థితి ఒక్కసారిగా ప్రమాదకరంగా మారడంతో విమానంలోని ప్రయాణికులు, సిబ్బంది తీవ్ర ఆందోళనకు గురయ్యారు. విమానాన్ని నియంత్రణలోకి తీసుకురావడం, ప్రయాణికుల భద్రతను కాపాడటం అప్పట్లో అత్యంత కీలకంగా మారింది. 

తీవ్రంగా గాయపడినప్పటికీ కెప్టెన్ మచ్ఛర్‌ తన చివరి శక్తిని కూడగట్టుకుని కాక్‌పిట్‌ తలుపును తెరిచేందుకు ప్రయత్నించారు. ఆయన చర్యతో ఇతర సిబ్బంది, విమానంలో ప్రయాణిస్తున్న విధి విరమణలో ఉన్న పైలట్లు, కొందరు ప్రయాణికులు కాక్‌పిట్‌లోకి ప్రవేశించి దాడి చేసిన వ్యక్తిని అదుపులోకి తీసుకోగలిగారు. అనంతరం విమానంలో ఉన్న మరో ఇద్దరు ఫ్లైదుబాయ్‌ పైలట్లు పరిస్థితిని చక్కదిద్ది, విమానాన్ని సౌదీ అరేబియాలోని తబుక్‌ విమానాశ్రయానికి మళ్లించారు. అక్కడ విమానం సురక్షితంగా దిగడంతో ప్రయాణికులు, సిబ్బంది ప్రాణాలతో బయటపడ్డారు. ఈ ఘటనలో మచ్ఛర్‌ తీవ్ర గాయాలపాలై వైద్య చికిత్స పొందారు.

ఈ సాహసాన్ని గుర్తించిన యూఏఈ నాయకత్వం విమాన సిబ్బందిని ప్రత్యేకంగా అభినందించింది. దుబాయ్‌ క్రౌన్ ప్రిన్స్‌, యూఏఈ ఉప ప్రధానమంత్రి, రక్షణ మంత్రి షేక్ హమ్దాన్ బిన్ మొహమ్మద్ అల్ మక్తూమ్ ఈ పురస్కారాలను అందజేశారు. అత్యంత ఒత్తిడితో కూడిన పరిస్థితుల్లో బాధ్యతాయుతంగా వ్యవహరించి ప్రయాణికుల భద్రతకు ప్రాధాన్యం ఇచ్చిన సిబ్బంది సేవలను ఆయన ప్రశంసించారు. యూఏఈ అధ్యక్షుడి నుంచి లభించిన ఈ గౌరవం తమకు గర్వకారణమని సిబ్బంది పేర్కొన్నారు. భారతీయ పైలట్‌ చూపిన ధైర్యం అంతర్జాతీయ స్థాయిలో గుర్తింపు పొందడం విశేషంగా నిలిచింది.