న్యూఢిల్లీ: ఐడీబీఐ బ్యాంక్‌ యాజమాన్యంలో కీలక మార్పునకు రంగం సిద్ధమైంది. బ్యాంకులో కేంద్ర ప్రభుత్వం, భారత జీవిత బీమా సంస్థ (ఎల్‌ఐసీ) కలిగి ఉన్న మెజారిటీ వాటాను కెనడాకు చెందిన ఫెయిర్‌ఫ్యాక్స్‌ ఫైనాన్షియల్‌ హోల్డింగ్స్‌ అనుబంధ సంస్థకు విక్రయించేందుకు కేంద్ర మంత్రివర్గం ఆమోదం తెలిపింది. ఈ ఒప్పందం విలువ సుమారు రూ.52,878 కోట్లు. భారత ఆర్థిక రంగంలో ఇప్పటివరకు జరిగిన అతిపెద్ద విదేశీ ప్రత్యక్ష పెట్టుబడి (FDI)గా ఇది నిలవనుంది.
60.72 శాతం వాటా విక్రయం
ఐడీబీఐ బ్యాంకులో కేంద్ర ప్రభుత్వానికి ఉన్న 30.48 శాతం వాటా, ఎల్‌ఐసీకి ఉన్న 30.24 శాతం వాటాను కలిపి మొత్తం 60.72 శాతం వాటాను విక్రయించనున్నారు. ఈ కొనుగోలుకు ఫెయిర్‌ఫ్యాక్స్‌ ఫైనాన్షియల్‌ హోల్డింగ్స్‌ అనుబంధ సంస్థ అయిన Canada Inc ను వ్యూహాత్మక కొనుగోలుదారుగా కేంద్ర మంత్రివర్గ ఆర్థిక వ్యవహారాల కమిటీ ఆమోదించింది.
ఒక్కో షేరుకు రూ.81 చొప్పున కొనుగోలు ధరను నిర్ణయించారు. స్వతంత్ర సంస్థలు అంచనా వేసిన ఒక్కో షేరు రూ.75.99 విలువ కంటే ఈ ధర ఎక్కువగా ఉంది. బిడ్డింగ్‌ ప్రక్రియ అనంతరం ఈ ప్రతిపాదనకు ఆమోదం లభించింది.
ప్రభుత్వం, ఎల్‌ఐసీ వాటాలు ఎంత?
విక్రయం పూర్తయిన తర్వాత ఐడీబీఐ బ్యాంకులో కేంద్ర ప్రభుత్వం 15 శాతం, ఎల్‌ఐసీ 19 శాతం వాటాలను కొనసాగిస్తాయి. ఈ రెండింటి వాటా కలిపి 34 శాతంగా ఉంటుంది. అయితే, ఈ ఒప్పందం పూర్తిగా అమలులోకి రావడానికి భారతీయ రిజర్వ్‌ బ్యాంకు (ఆర్‌బీఐ) సహా సంబంధిత నియంత్రణ సంస్థల అనుమతులు అవసరం.
మైనారిటీ వాటాదారుల కోసం ఫెయిర్‌ఫ్యాక్స్‌ ఓపెన్‌ ఆఫర్‌ కూడా ఇవ్వాల్సి ఉంటుంది. ఈ ప్రక్రియలు పూర్తయ్యాకే యాజమాన్య మార్పు అమల్లోకి వస్తుంది.
ఒకప్పుడు సంక్షోభంలో.. ఇప్పుడు విక్రయానికి సిద్ధం
ఐడీబీఐ బ్యాంక్‌ గతంలో భారీ నిరర్థక ఆస్తులు (ఎన్‌పీఏలు), నష్టాలతో ఆర్థిక ఇబ్బందులను ఎదుర్కొంది. 2017లో ఆర్‌బీఐ ఈ బ్యాంకును ప్రాంప్ట్‌ కరెక్టివ్‌ యాక్షన్‌ (పీసీఏ) పరిధిలోకి తీసుకొచ్చింది. ఆర్థిక పరిస్థితి మెరుగుపడటంతో 2021లో ఆంక్షలను ఎత్తివేసి, నిరంతర పర్యవేక్షణను కొనసాగించింది.
బ్యాంకు ఆర్థిక స్థితిలో వచ్చిన మెరుగుదల నేపథ్యంలో ప్రైవేటీకరణ ప్రక్రియకు కేంద్రం ముందడుగు వేసింది. ఈ విక్రయం ద్వారా బ్యాంకుకు కొత్త మూలధనం, సాంకేతిక పరిజ్ఞానం, మెరుగైన నిర్వహణ పద్ధతులు అందే అవకాశం ఉందని ప్రభుత్వం భావిస్తోంది.
ఫెయిర్‌ఫ్యాక్స్‌ రాకతో ఖాతాదారులకు ఏమవుతుంది?
యాజమాన్యం మారుతున్నంత మాత్రాన ఖాతాదారుల డిపాజిట్లు లేదా బ్యాంకింగ్‌ సేవలు వెంటనే మారిపోతాయని భావించాల్సిన అవసరం లేదు. ఐడీబీఐ బ్యాంక్‌ ఆర్‌బీఐ నియంత్రణలోనే కొనసాగుతుంది. ఖాతాలు, డిపాజిట్లు, రుణాలు, డిజిటల్‌ సేవలకు సంబంధించి ఏవైనా మార్పులు ఉంటే బ్యాంకు అధికారిక ప్రకటనలను గమనించడం మంచిది.
ఫెయిర్‌ఫ్యాక్స్‌ ప్రవేశంతో బ్యాంకు కార్యకలాపాలను విస్తరించడం, సాంకేతికతను మెరుగుపరచడం, రుణాలు–డిపాజిట్ల వ్యాపారాన్ని పెంచడం వంటి అవకాశాలు ఉన్నాయని ప్రభుత్వం భావిస్తోంది. అయితే, ఈ మార్పుల ప్రభావం ఎలా ఉంటుందన్నది ఒప్పందం పూర్తయ్యాక, కొత్త నిర్వహణ తీసుకునే నిర్ణయాలపై ఆధారపడి ఉంటుంది.
ప్రభుత్వ ప్రైవేటీకరణ విధానంలో కీలక అడుగు
ఐడీబీఐ బ్యాంక్‌ విక్రయ ప్రక్రియ 2022లో ప్రకటించినప్పటికీ, బిడ్డింగ్‌, ధరల అంచనాలు, నియంత్రణపరమైన అంశాల కారణంగా ఆలస్యమైంది. తాజా ఆమోదంతో ఈ ప్రక్రియ కీలక దశకు చేరుకుంది. ఒప్పందం పూర్తయితే ప్రభుత్వ రంగ ఆస్తుల విక్రయం, బ్యాంకింగ్‌ రంగంలో విదేశీ పెట్టుబడుల విషయంలో ఇది ముఖ్యమైన పరిణామం కానుంది.
