అమెరికాలోని లాస్ వేగాస్‌లో జరుగుతున్న 2026 U23 ప్రపంచ రెజ్లింగ్ ఛాంపియన్‌షిప్‌లో భారత ఫ్రీస్టైల్ రెజ్లర్లు అద్భుత ప్రదర్శనతో సంచలనం సృష్టించారు. గట్టి పోటీదారులైన అమెరికన్ రెజ్లర్లను ఓడించి భారత యువ రత్నాలు తమ సత్తా చాటారు. వీసా సమస్యలు ఎదురైనప్పటికీ, ఏమాత్రం తగ్గకుండా రింగ్‌లో పోరాడి పతకాల రేసులో నిలిచారు.
65 కేజీల ఫ్రీస్టైల్ విభాగం క్వార్టర్ ఫైనల్స్‌లో భారత రెజ్లర్ జస్కరన్ సింగ్ అద్భుత ప్రతిభను కనబరిచారు. అమెరికాకు చెందిన U20 వరల్డ్ ఛాంపియన్ బోవెన్ బాసెట్‌పై తొలత వెనుకబడినప్పటికీ, తీవ్రంగా శ్రమించి 6-3 తేడాతో విజయాన్ని అందుకుని షాక్ ఇచ్చారు. ఆ తర్వాత సెమీఫైనల్స్‌లో జపాన్‌కు చెందిన కైజీ ఒగినో చేతిలో ఓటమి పాలైన జస్కరన్, ఆదివారం ఉదయం జరిగే కాంస్య పతక (Bronze Medal) పోరుకు అర్హత సాధించారు.
మరొకవైపు 79 కేజీల విభాగంలో చందర్‌మోహన్ ఆధిపత్యాన్ని ప్రదర్శించారు. క్వాలిఫికేషన్ రౌండ్‌లో అమెరికా రెజ్లర్ జోసెఫ్ సీలీపై 11-0 తేడాతో ఏకపక్ష విజయం సాధించిన ఆయన, ఆ తదుపరి రౌండ్లలో బ్రెజిల్ మరియు జార్జియా రెజ్లర్లను వరుసగా ఓడించి సెమీఫైనల్స్‌కు చేరుకున్నారు. సెమీస్‌లో ఇరాన్‌కు చెందిన మహదీ యూసఫీహాజీవర్‌తో జరిగిన హోరాహోరీ పోరులో క్రైటీరియా ఆధారంగా పరాజయం పొందిన చందర్‌మోహన్, ఆదివారం ఉదయం కాంస్య పతకం కోసం బరిలోకి దిగనున్నారు.
