జమ్మూ కాశ్మీర్ పర్వత శ్రేణుల్లో భారతీయ రైల్వే ఇంజనీరింగ్ అద్భుతం మరో ఘనమైన మైలురాయిని చేరుకుంది. కత్రా-బనిహాల్ మధ్య 111 కిలోమీటర్ల పరిధిలోని ప్రపంచంలోనే అత్యంత ఎత్తైన ‘చీనాబ్ రైల్వే వంతెన’ మరియు భారతదేశపు తొలి కేబుల్-స్టేడ్ రైల్వే బ్రిడ్జ్ ‘అంజీ ఖాద్’లపై వందే భారత్ ఎక్స్‌ప్రెస్ (ట్రైన్ నంబర్ 26401/26404) గంటకు 100 కిలోమీటర్ల వేగంతో విజయవంతంగా దూసుకెళ్లింది. అవసరమైన భద్రతా అనుమతులు లభించడంతో ఈ మార్గంలో వేగ పరిమితిని గతంలో ఉన్న 75 కి.మీ నుంచి 100 కి.మీకు అధికారులు పెంచారు. నది మట్టానికి ఏకంగా 359 మీటర్ల ఎత్తులో ఉన్న చీనాబ్ బ్రిడ్జ్‌పై రైలు వేగంగా వెళ్తున్న దృశ్యాలను కేంద్ర రైల్వే మంత్రి అశ్విని వైష్ణవ్ సామాజిక మాధ్యమాల్లో పంచుకుంటూ, ఇది భారతీయ ఇంజనీరింగ్ ప్రతిభకు నిదర్శనమని కొనియాడారు.
ఉధంపూర్-శ్రీనగర్-బారాముల్లా రైల్ లింక్ (USBRL) ప్రాజెక్టులో భాగమైన ఈ విభాగంలో వేగాన్ని పెంచడం వల్ల ప్రయాణ సమయం గణనీయంగా తగ్గనుంది. కాశ్మీర్ లోయను దేశంలోని ఇతర ప్రాంతాలతో అన్ని కాలాల్లోనూ (All-Weather Connectivity) సులువుగా అనుసంధానించేందుకు ఈ పురోగతి ఎంతగానో తోడ్పడుతుందని రైల్వే అధికారులు తెలిపారు. ఈ మార్గంలో వందే భారత్ రైలు వేగవంతమైన ప్రయాణం ద్వారా ప్రయాణికులకు మెరుగైన అనుభూతి లభించడమే కాకుండా, స్థానిక పర్యాటక రంగం మరియు ఆర్థిక వ్యవస్థకు పెద్ద ఎత్తున ఊతం లభించనుంది.
