రష్యాకు చెందిన దూర ప్రాచ్య (Far East) ప్రాంతమైన కామ్‌చట్కా ద్వీపకల్పంలో (Kamchatka Peninsula) రిక్టర్ స్కేలుపై 7.0 తీవ్రతతో అత్యంత భారీ భూకంపం సంభవించింది. యూరోపియన్-మెడిటరేనియన్ సీస్మోలాజికల్ సెంటర్ (EMSC) వివరాల ప్రకారం, స్థానిక కాలమానం ప్రకారం మధ్యాహ్నం 3:35 గంటల సమయంలో ఈ భూకంపం సంభవించింది. విల్యుచిన్స్క్ (Vilyuchinsk) నగరానికి నైరుతి దిశలో 123 కిలోమీటర్ల దూరంలో, భూమికి 140 కిలోమీటర్ల లోతులో భూకంప కేంద్రం (Epicentre) ఉన్నట్లు అధికారులు ధృవీకరించారు.
ఈ భారీ తీవ్రత నమోదైనప్పటికీ, భూకంపం చాలా లోతులో రావడం వల్ల ప్రస్తుతానికి ఎలాంటి సునామీ ప్రమాదం లేదని అమెరికా నేషనల్ సునామీ వార్నింగ్ సెంటర్ స్పష్టం చేసింది. భూకంప ప్రభావం వల్ల తభవించిన ఆస్తి, ప్రాణ నష్టానికి సంబంధించిన వివరాలు ఇంకా వెల్లడి కాలేదు.
జపాన్ పొరపాటు హెచ్చరిక:
ఈ భూకంపం సంభవించిన సమయంలో జపాన్ వాతావరణ సంస్థ (JMA) సాంకేతిక లోపం వల్ల తమ అత్యవసర వ్యవస్థలో తీవ్రతను 9.9 గా నమోదు చేస్తూ దేశవ్యాప్తంగా విపరీతమైన ప్రకంపనలు రానున్నట్లు పొరపాటున హెచ్చరిక జారీ చేసింది. అయితే, ఆ తర్వాత తమ సిస్టమ్ రీడింగ్ వాస్తవానికి 6.9 గా ఉందని సరిచేసింది. ఒకవేళ ఈ హెచ్చరిక నిజమై ఉంటే, మానవ చరిత్రలోనే నమోదైన అతిపెద్ద భూకంపంగా నిలిచేది (గతంలో 1960లో చిలీలో నమోదైన 9.5 తీవ్రతే అత్యధికం). కామ్‌చట్కా ప్రాంతం ప్రశాంత మహాసముద్రం చుట్టూ ఉన్న అత్యంత ప్రమాదకరమైన ‘రింగ్ ఆఫ్ ఫైర్’ (Ring of Fire) భూకంప ప్రాంతంలో ఉండటం వల్ల ఇక్కడ తరచూ ఇలాంటి భారీ భూకంపాలు సంభవిస్తుంటాయని భూవిజ్ఞాన శాస్త్రవేత్తలు తెలిపారు.
