తెలుగు సినిమా సత్తాను ప్రపంచ వేదికపై చాటిచెప్పి, ఆస్కార్ అవార్డు సాధించి చరిత్ర సృష్టించిన దర్శకధీరుడు ఎస్.ఎస్. రాజమౌళి హాలీవుడ్ ఎంట్రీపై మనసు విప్పారు. బ్రెజిల్‌లో జరిగిన ప్రతిష్టాత్మకమైన 50వ ‘సావో పాలో అంతర్జాతీయ ఫిల్మ్ ఫెస్టివల్’లో పాల్గొన్న ఆయన, అక్కడ అంతర్జాతీయ మీడియాతో మాట్లాడుతూ హాలీవుడ్ ఆఫర్ల గురించి, అలాగే సూపర్ స్టార్ మహేష్ బాబుతో తెరకెక్కిస్తున్న తన రాబోయే భారీ ప్రాజెక్ట్ ‘వారణాసి’ (Varanasi) పై సంచలన వ్యాఖ్యలు చేశారు.
‘ఆర్ఆర్ఆర్’ (RRR) గ్లోబల్ స్థాయిలో అఖండ విజయాన్ని సాధించిన తర్వాత హాలీవుడ్ ఇండస్ట్రీ నుంచి తనకు అనేక చిత్రాలకు దర్శకత్వం వహించే అవకాశాలు వచ్చాయని రాజమౌళి వెల్లడించారు. అంతేకాకుండా అందులో కొన్ని ఆఫర్లు ఇప్పటికీ ఓపెన్‌గానే ఉన్నాయని చెప్పారు. ప్రపంచంలోనే ప్రముఖ డైరెక్టర్ల లాగే తనకు కూడా హాలీవుడ్‌లో కనీసం ఒక్క చిత్రానికైనా దర్శకత్వం వహించాలనే బలమైన కోరిక ఉందని తెలిపారు. అక్కడి వర్క్ కల్చర్, ప్రొడక్షన్ సిస్టమ్ మరియు ప్రొఫెషనల్ స్టాండర్డ్స్ నుంచి నేర్చుకోవడానికి ఎంతో ఉందన్నారు.
అయితే హాలీవుడ్ ప్రాజెక్ట్‌లను అప్పట్లోనే ఎందుకు ఒప్పుకోలేదనే విషయాన్ని కూడా జక్కన్న స్పష్టం చేశారు. ‘ఆర్ఆర్ఆర్’ సమయానికే తన డ్రీమ్ ప్రాజెక్ట్ అయిన ‘వారణాసి’ ప్రీ-ప్రొడక్షన్ పనులు ప్రారంభమయ్యాయని, ఒకే సమయంలో రెండు విభిన్న ప్రాజెక్ట్‌లపై దృష్టి పెట్టడం తనకు కుదరదని వివరించారు. ఒక సినిమా పూర్తిగా పూర్తయిన తర్వాతే మరొక సినిమా గురించి ఆలోచిస్తానని, అందుకే ఆ ఆఫర్లను పక్కన పెట్టాల్సి వచ్చిందని చెప్పారు.
ప్రస్తుతం తను తెరకెక్కిస్తున్న ‘వారణాసి’ చిత్రం గురించి రాజమౌళి మాట్లాడుతూ ఒక అదిరిపోయే అప్‌డేట్ ఇచ్చారు. ఎపిక్ యాక్షన్ అడ్వెంచర్‌గా రూపుదిద్దుకుంటున్న ఈ సినిమా ప్రధాన చిత్రీకరణ దాదాపు పూర్తయిందని, కేవలం మరొక 10 రోజుల షూటింగ్ మాత్రమే బ్యాలెన్స్ ఉందని వెల్లడించారు. మహేష్ బాబు, ప్రియాంక చోప్రా, పృథ్వీరాజ్ సుకుమారన్ ప్రధాన పాత్రలలో నటిస్తున్న ఈ చిత్రం 2027 ఏప్రిల్ 7న ప్రపంచవ్యాప్తంగా గ్రాండ్‌గా విడుదల కానుంది. ‘వారణాసి’ పూర్తయిన తర్వాతే హాలీవుడ్ అవకాశాల గురించి ఆలోచిస్తానని ఆయన స్పష్టం చేశారు.
