తెలుగు చిత్ర పరిశ్రమలో తీవ్ర విషాదం నెలకొంది. నాలుగు దశాబ్దాలకు పైగా తన విలక్షణ నటనతో ప్రేక్షకులను అలరించిన ప్రముఖ సీనియర్ నటుడు, నిర్మాత, దర్శకుడు గిరిబాబు (80) శనివారం కన్నుమూశారు. గత కొంతకాలంగా అనారోగ్యంతో బాధపడుతున్న ఆయన, హైదరాబాద్ కొండాపూర్‌లోని ఒక ప్రైవేట్ ఆసుపత్రిలో చికిత్స పొందుతూ తుదిశ్వాస విడిచారు. ఆయన మరణవార్తతో టాలీవుడ్ ప్రముఖులు, అభిమానులు తీవ్ర దిగ్భ్రాంతికి లోనయ్యారు.
1946 జూన్ 8న ప్రకాశం జిల్లా కొరిశపాడు మండలం రావినూతల గ్రామంలో ఒక రైతు కుటుంబంలో జన్మించిన గిరిబాబు అసలు పేరు యర్రా శేషగిరిరావు. రంగస్థల నాటకాల ద్వారా నటనపై మక్కువ పెంచుకున్న ఆయన, తొలుత సొంతంగా నాటక సమాజాన్ని స్థాపించి ఆ తర్వాత సినీ రంగంలోకి అడుగుపెట్టారు. కెరీర్ ప్రారంభంలో ఆయన నటించిన మొదటి మూడు సినిమాలు ఆగిపోయినప్పటికీ, పట్టువదలకుండా ప్రయత్నించి 1973లో విడుదలైన ‘జగమే మాయ’ చిత్రంతో హీరోగా వెండితెరకు పరిచయమయ్యారు.
అనంతరం కథానాయకుడిగా, ప్రతినాయకుడిగా, క్యారెక్టర్ ఆర్టిస్ట్‌గా తనదైన ముద్ర వేసిన గిరిబాబు దాదాపు 600లకు పైగా చిత్రాల్లో నటించి మెప్పించారు. ‘భైరవద్వీపం’, ‘హలో బ్రదర్’, ‘అతడు’, ‘నువ్వేకావాలి’, ‘అ.. ఆ’, ‘గీత గోవిందం’ వంటి ఎన్నో విజయవంతమైన చిత్రాల్లో ఆయన పోషించిన పాత్రలు చిరస్మరణీయంగా నిలిచాయి. నటుడిగానే కాకుండా ‘సింహ గర్జన’, ‘మెరుపుదాడి’ వంటి సినిమాలకు నిర్మాతగా, ‘రణరంగం’, ‘ఇంద్రజిత్’, ‘నీ సుఖమే నే కోరుకున్నా’ చిత్రాలకు దర్శకుడిగా కూడా తన ప్రతిభను చాటుకున్నారు. 2023లో విడుదలైన ‘అన్నీ మంచి శకునములే’ ఆయన నటించిన చివరి చిత్రం. గిరిబాబు కుమారుడు రఘుబాబు ప్రస్తుతం తెలుగు సినీ పరిశ్రమలో ప్రముఖ హాస్యనటుడిగా కొనసాగుతున్నారు.
