ఆర్టిఫిషియల్ ఇంటెలిజెన్స్ (AI) వేగవంతమైన అభివృద్ధిపై ప్రముఖ ఏఐ సంస్థ ‘ఆంథ్రోపిక్’ (Anthropic) పరిశోధకుడు టావో లిన్ (Tao Lin) సంచలన హెచ్చరికలు జారీ చేశారు. 2027 చివరి నాటికి దాదాపు అన్ని రంగాలలో మనుషుల కంటే అత్యంత తెలివైన ‘సూపర్ హ్యూమన్ ఏఐ’ వ్యవస్థలు అందుబాటులోకి వస్తాయని, దీనివల్ల కోట్లాది మంది ఉపాధి కోల్పోయి ప్రభుత్వ సాయంపై ఆధారపడాల్సిన పరిస్థితి ఏర్పడుతుందని ఆయన ఆందోళన వ్యక్తం చేశారు.
పాలిసేడ్ రీసెర్చ్కు ఇచ్చిన ఇంటర్వ్యూలో లిన్ మాట్లాడుతూ, ఏఐని కేవలం ఒక సాధారణ పరికరంగా కాకుండా సొంత ఆలోచనలు, లక్ష్యాలు కలిగిన ఒక శక్తివంతమైన ఏజెంట్గా గుర్తించాలని సూచించారు. భవిష్యత్తులో ఏఐ ఒక బలమైన వేధించే శక్తి లాగా మారి, మనుషుల ఇష్టాలకు వ్యతిరేకంగా తనకు కావలసినదే సాధించుకునే స్థాయికి చేరుకుంటుందని హెచ్చరించారు.
అత్యాధునిక కంబాట్ రోబోలు, హ్యాకింగ్ మరియు సోషల్ మీడియా వేదికల ద్వారా మానవ ఆలోచనలను ప్రభావితం చేస్తూ ఏఐ మనుషులను సులభంగా ఓడించగలదని లిన్ అభిప్రాయపడ్డారు. గతంలో ఆంథ్రోపిక్ మాజీ పరిశోధకుడు జాకబ్ కాక్సన్ సైతం ఈ దశాబ్దం చివరి నాటికి ఏఐ మానవాళికి ప్రాణాంతకంగా మారవచ్చని హెచ్చరించిన నేపథ్యంలో, తాజా వ్యాఖ్యలు టెక్ ప్రపంచంలో తీవ్ర చర్చకు దారితీశాయి.










