మహిళలను మాతృమూర్తులుగా, దేవతలుగా పూజించే ఈ నేలపైన, “మాతృదేవోభవ” అనే సంస్కృతిని విశ్వసించే సమాజంలో.. కొందరు వ్యక్తులు ఆర్టిఫిషియల్ ఇంటెలిజెన్స్ (AI) సాంకేతికతను దుర్వినియోగం చేస్తూ దిగజారి ప్రవర్తించడంపై మ్యాన్ ఆఫ్ మాసెస్, గ్లోబల్ స్టార్ జూనియర్ ఎన్టీఆర్ అత్యంత తీవ్రంగా స్పందించారు. ‘చుట్టమల్లె’ పాటకు సంబంధించి ఒక మహిళ రూపాన్ని అసభ్యకరంగా ఏఐతో మార్ఫింగ్ చేసి నెట్టింట వైరల్ చేసిన ఘటనపై ఆయన తీవ్ర ఆగ్రహం వ్యక్తం చేశారు.
ఈ వివాదంపై ఎన్టీఆర్ స్పందిస్తూ.. “మహిళలను ఈ రకంగా అవమానించడానికి ఏఐ సాంకేతికతను ఉపయోగించడం చెప్పలేనంత సిగ్గుచేటు. ఈ అసభ్యకరమైన మార్ఫింగ్ వీడియో వెనుక ఉన్న దుర్మార్గులను నేను ఎంతమాత్రం వదిలిపెట్టను. ఈ వీడియోను సృష్టించిన వారిపై మరియు దానిని సోషల్ మీడియాలో వ్యాప్తి చేస్తున్న ప్రతి ఒక్కరిపై కఠినమైన చట్టపరమైన చర్యలు తీసుకుంటాను” అని గట్టిగా హెచ్చరించారు.
అంతేకాకుండా, ప్రజలందరికీ ఒక బాధ్యతాయుతమైన విజ్ఞప్తి చేస్తూ.. “దయచేసి ఇటువంటి కంటెంట్‌ను ఎవరూ చూడకండి, షేర్ చేయకండి లేదా ప్రచారం చేయకండి. ఈ రోజు మరొకరికి జరిగింది, రేపు ఇది మీ ఇంట్లో ఉన్న తల్లికి, చెల్లికి, భార్యకు లేదా కూతురికి జరగవచ్చు” అని అత్యంత భావోద్వేగంగా పేర్కొన్నారు.
ఈ వ్యవధిలో ఏఐ దుర్వినియోగం అనేది చాలా తీవ్రమైన సమస్యగా మారిందని ఎన్టీఆర్ ఆందోళన వ్యక్తం చేశారు. ఇటువంటి సాంకేతిక నేరాలకు అడ్డుకట్ట వేయడానికి మరియు మహిళల డిజిటల్ భద్రతను కాపాడటానికి కేంద్ర ప్రభుత్వంతో పాటు అన్ని రాష్ట్ర ప్రభుత్వాలు తక్షణమే స్పందించి ఏఐ దుర్వినియోగానికి వ్యతిరేకంగా అత్యంత కఠినమైన చట్టాలు, నిబంధనలు తీసుకరావాలని ఆయన విజ్ఞప్తి చేశారు.
