న్యూఢిల్లీ: ప్రపంచవ్యాప్తంగా భౌగోళిక, ఆర్థిక అనిశ్చితులు కొనసాగుతున్నప్పటికీ భారత ఆర్థిక వ్యవస్థ తన వృద్ధి వేగాన్ని కొనసాగించే అవకాశాలు కనిపిస్తున్నాయి. ప్రస్తుత ఆర్థిక సంవత్సరంలో భారత్ 6.5–7 శాతం రియల్ జీడీపీ వృద్ధిని నమోదు చేసే దిశగా ఉందని ప్రముఖ బ్రోకరేజ్ సంస్థ జెఫరీస్ తన తాజా నివేదికలో అంచనా వేసింది. నామమాత్ర జీడీపీ వృద్ధి సుమారు 11–12 శాతం ఉండొచ్చని పేర్కొంది.
భారత్ ఆర్థిక వ్యవస్థకు ప్రధాన బలంగా దేశీయ డిమాండ్ కొనసాగుతోందని జెఫరీస్ పేర్కొంది. బ్యాంకు రుణాల వృద్ధి వేగం పెరగడం, ముఖ్యంగా సూక్ష్మ, చిన్న, మధ్య తరహా పరిశ్రమలకు (MSMEs) రుణాల విస్తరణ ఆర్థిక కార్యకలాపాల్లో మెరుగుదలకు సంకేతాలుగా కనిపిస్తున్నాయని తెలిపింది. జూలైలో బ్యాంకు రుణ వృద్ధి వార్షిక ప్రాతిపదికన 17.8 శాతానికి చేరగా, MSME రుణాలు 24.9 శాతం పెరిగినట్లు నివేదికలో పేర్కొంది.
కార్పొరేట్ రుణాల పెరుగుదల ప్రైవేట్ రంగంలో పెట్టుబడుల చక్రం మళ్లీ వేగం పుంజుకునే అవకాశం ఉందనే సంకేతాలను ఇస్తోందని జెఫరీస్ అభిప్రాయపడింది. పరిశ్రమలకు ఇచ్చే రుణాలు 20 శాతం, సేవల రంగ రుణాలు 22.9 శాతం, కార్పొరేట్ రుణాలు 21.6 శాతం పెరిగినట్లు నివేదిక వెల్లడించింది. ప్రైవేట్ క్యాపెక్స్ (మూలధన వ్యయం)లో పునరుద్ధరణకు ఇది దోహదపడొచ్చని పేర్కొంది. దేశీయ ఆర్థిక కార్యకలాపాల్లో బలాన్ని సూచించే మరో అంశంగా జీఎస్టీ వసూళ్లు, విద్యుత్ వినియోగం, రియల్ ఎస్టేట్ అమ్మకాలను జెఫరీస్ ప్రస్తావించింది. ఆగస్టులో జీఎస్టీ వసూళ్లు వార్షిక ప్రాతిపదికన 14.8 శాతం పెరిగాయి. ఏప్రిల్–ఆగస్టు కాలంలో విద్యుత్ డిమాండ్ వృద్ధి 9.4 శాతానికి చేరింది. దేశంలోని టాప్ ఏడు నగరాల్లో ఈ ఏడాది తొలి ఏడు నెలల్లో నివాస గృహాల అమ్మకాల విస్తీర్ణం 7 శాతం పెరిగినట్లు నివేదిక తెలిపింది. నామమాత్ర జీడీపీ వృద్ధి మెరుగుపడితే కార్పొరేట్ కంపెనీల ఆదాయ వృద్ధికి కూడా మద్దతు లభించే అవకాశం ఉందని జెఫరీస్ అంచనా వేసింది. ప్రస్తుత ఆర్థిక సంవత్సరంలో కంపెనీల ఆదాయ వృద్ధి సుమారు 14 శాతం ఉండొచ్చని, వచ్చే ఆర్థిక సంవత్సరంలో ఇది 17 శాతానికి పెరగవచ్చని పేర్కొంది.
రిస్కులు మాత్రం కొనసాగుతున్నాయి
అయితే ఈ వృద్ధి అంచనాలకు కొన్ని సవాళ్లు కూడా ఉన్నాయి. అధిక ఇంధన ధరలు, అంతర్జాతీయ పరిణామాలు, బాహ్య డిమాండ్లో బలహీనత, ఆహార ధరలపై ప్రభావం చూపే వాతావరణ పరిస్థితులు వంటి అంశాలు భారత ఆర్థిక వృద్ధిపై ప్రభావం చూపే అవకాశం ఉంది. Moody’s కూడా ఇటీవల భారత్ వృద్ధి అంచనాను 7 శాతానికి పెంచినప్పటికీ, ఇంధన-ఎరువుల దిగుమతి వ్యయాలు, పశ్చిమాసియా పరిణామాలు, బలహీనమైన బాహ్య డిమాండ్ వంటి రిస్కులను ప్రస్తావించింది.
మొత్తంగా చూస్తే, దేశీయ వినియోగం, రుణాల విస్తరణ, పెట్టుబడులు, సేవల రంగం వంటి అంశాలు భారత ఆర్థిక వ్యవస్థకు ప్రస్తుతం మద్దతుగా నిలుస్తున్నాయి. ఈ పరిస్థితుల్లో ప్రస్తుత ఆర్థిక సంవత్సరంలో 6.5–7 శాతం రియల్ జీడీపీ వృద్ధి సాధించే దిశగా భారత్ ఉందన్నది జెఫరీస్ తాజా అంచనా.
