ఆర్టిఫిషియల్ ఇంటెలిజెన్స్ (AI) సాంకేతికత నేడు విద్యా వ్యవస్థను, విద్యార్థుల అభ్యాస శైలిని మూలమట్టంగా మార్చేస్తోంది. సాంకేతిక పరిజ్ఞానం రోజురోజుకూ విస్తరిస్తున్న వేళ, పిల్లలు తమ సొంత మేధస్సుకు పదును పెట్టడం తగ్గించి, సమస్యల పరిష్కారానికి AI సాధనాలపై ఎక్కువగా ఆధారపడుతున్నారు. దీని పరిణామాలపై ప్రపంచంలోనే అత్యంత విలువైన ఏఐ చిప్ తయారీ సంస్థ ఎన్విడియా (Nvidia) సీఈఓ జెన్సన్ హువాంగ్ (Jensen Huang) చేసిన వ్యాఖ్యలు ఇప్పుడు ప్రపంచవ్యాప్తంగా తీవ్ర చర్చనీయాంశమయ్యాయి.
“ప్రాథమిక గణితం కనుమరుగవుతోంది”
ప్రముఖ విలేకరి ఎజ్రా క్లైన్ (Ezra Klein) టాక్ షోలో పాల్గొన్న జెన్సన్ హువాంగ్, ఏఐ విస్తరణ వల్ల పిల్లల్లో ప్రాథమిక గణిత నైపుణ్యాలు క్షీణిస్తున్నాయని స్పష్టం చేశారు.
“ఇప్పుడున్న పిల్లలను పెద్ద భాగాహారాలు (Long Divisions) చేయమనండి, లేదా ఎక్కాలు (Multiplication Tables), వర్గమూలాలు (Square Roots) అడగండి.. వారు తీవ్రంగా ఇబ్బంది పడతారు. మౌలిక గణిత నైపుణ్యాలను మానవాళి మరచిపోతోంది.”
— జెన్సన్ హువాంగ్
అయితే, “ఇలా ప్రాథమిక గణితం మరచిపోవడం నిజంగా పెద్ద సమస్యేనా?” అని ఆయనే ప్రశ్నిస్తూ.. “నాకైతే ఇది పెద్ద సమస్యగా అనిపించడం లేదు అని బదులిచ్చారు. “నా సొంత చిరునామా, పిన్కోడ్ కూడా నాకు గుర్తుండవు” సాంకేతికత అందుబాటులో ఉన్నప్పుడు అన్ని విషయాలు గుర్తుపెట్టుకోవాల్సిన అవసరం లేదని సమర్థిస్తూ, హువాంగ్ తన జీవితంలో జరిగిన ఒక ఆసక్తికర సంఘటనను పంచుకున్నారు. కొన్నేళ్ల క్రితం ఒకసారి కార్లో పెట్రోల్ కొట్టించడానికి వెళ్లినప్పుడు, అక్కడ ‘జిప్ కోడ్’ (ZIP Code) అడిగితే తను తీవ్రంగా కంగారు పడ్డానని, ఆ సమయంలో తనకు అది గుర్తుకు రాలేదని చెప్పారు. ఆధునిక సాంకేతికత మరియు సహాయకులు అందుబాటులో ఉన్నప్పుడు ప్రతి చిన్న విషయాన్ని మెదడులో దాచుకోవాల్సిన అవసరం లేదని, దానికి బదులుగా కొత్త విశ్లేషణాత్మక నైపుణ్యాలపై దృష్టి పెట్టవచ్చని ఆయన అభిప్రాయపడ్డారు. చైనాలోని 26,000 మంది విద్యార్థులపై జరిపిన ఒక పరిశోధనాత్మక అధ్యయనాన్ని ఈ సందర్భంగా ప్రస్తావించారు. ఆ అధ్యయనం ప్రకారం, ఏఐ సాధనాలను ఉపయోగించడం వల్ల విద్యార్థులు తమ హోమ్వర్క్ను చాలా వేగంగా చేయగలిగారు. కానీ, పరీక్షల్లో మాత్రం వారి పనితీరు క్షీణించింది. దాదాపు 6 నెలల వ్యవధిలో వారి మార్కులు 20 శాతం వరకు పడిపోయాయి.
ఈ పరిశోధన ఫలితాలపై హువాంగ్ స్పందిస్తూ, ఇందులో ఆశ్చర్యపోవడానికి ఏమీ లేదని అన్నారు. విద్యార్థులు రొటీన్ లెక్కల నుంచి బయటకు వచ్చి, “సిస్టమ్స్ థింకింగ్” (పెద్ద మరియు సంక్లిష్టమైన వ్యవస్థలను అర్థం చేసుకునే నైపుణ్యం) వంటి నూతన ఆలోచనా ధోరణులను అలవర్చుకుంటారని చెప్పారు.
నిపుణుల ఆందోళన మరియు భిన్నాభిప్రాయాలు
జెన్సన్ హువాంగ్ అభిప్రాయంతో టెక్ వర్గాలు ఏకీభవిస్తున్నప్పటికీ, విద్యావేత్తలు మరియు సమాజ శాస్త్రవేత్తలు మాత్రం తీవ్ర ఆందోళన వ్యక్తం చేస్తున్నారు. AIపై అతిగా ఆధారపడటం వల్ల విద్యార్థులలో స్వతంత్రంగా ఆలోచించే సామర్థ్యం తగ్గుతుందని నిపుణులు హెచ్చరిస్తున్నారు. కేవలం 10 నుండి 15 నిమిషాలు AI సాధనాలను ఉపయోగించినా, మెదడు శ్రమ తగ్గించుకుని “మానసిక బద్ధకానికి” (Cognitive Laziness) అలవాటు పడుతుందని ఇటీవల కొన్ని అధ్యయనాలు వెల్లడించాయి.ప్రాథమిక గణితం మరియు తార్కిక ఆలోచన లేకపోతే, భవిష్యత్తులో సంక్లిష్ట సమస్యలను ఎలా విశ్లేషిస్తారనేది మిగిలి ఉన్న ప్రధాన ప్రశ్న.
జెన్సన్ హువాంగ్ వ్యాఖ్యలు సాంకేతిక పరిణామక్రమంలో సరికొత్త కోణాన్ని ఆవిష్కరించాయి. పాత నైపుణ్యాలు కనుమరుగై కొత్త నైపుణ్యాలు రావడం సహజమే అయినప్పటికీ, ప్రాథమిక ఆలోచనా సామర్థ్యాన్ని కోల్పోకుండా ఏఐని ఒక సహాయక సాధనంగా మాత్రమే ఉపయోగించుకోవడం నేటి తరం విద్యార్థులకు అత్యంత ఆవశ్యకం.
